Cassius Dio

Dr Kassius Dio, wo öppen anne 163 z Nikaia in Bithynie z Chlyasie uf d Wält cho und nach em Joor 229 gstorben isch, isch e römische Politiker und Gschichtschryber gsi. Dio isch e Zuename, won er für siich sälber usgwält het.

Er isch vonnere ryche Famlie us em Oschte vom Röömische Rych gsi. Si Vatter het Cassius Apronianus gheisse. Er het Griechisch als Muettersprooch gredt und syni Schriften au i dere Sprooch ufgsetzt, er hat aber au guet d Sprooch vo dr Hauptstadt, s Latynisch chönne; er isch uff Rom gange, won er e schööni politischi Karriere gha het. Er isch Senator, Verwalter vo verschidene Stedt, Prokonsul vo Afrika, Statthalter vo de Provinzen Oberpannoonie und Dalmazien und zwöimol Konsul woorde. Öppen im Alter vo Föifesächzgi isch er is sys Heimetland Bithynie zrugg, won er es paar Joor drufabe gstoorben isch.

Näbe synere prestyschträchtigen Arbet i den öfentlichen Ämter het der Kassius vil Zyt bruucht zum es grosses Gschichtswäärch z schrybe. I däm ryche, usfüerliche Bricht über die Römischi Gschicht, wo im Original uf Griechisch isch, verzellt dr Kassius, was alls bassiert isch vo doo, wo dr Aeneas uf Itaalie choo isch, und de vo däm Momänt, wo me d Stadt Rom gründet het, und bis zu sym Regierigsjoor als Konsul anne 229. Das Wäärch isch ydeilt i achzg Büecher.

Das bedüütende Wäärch isch leider nümme ganz erhalte; die Teili, wo me no könnt, het men i ganz verschidene Schriften us em Mittelalter gfunden und wider zämetreit. Vill Abschnitt vo dämm, wo me hüt no cha lääse, sind aber wichtigi und teils äinzigartigi Kwelle für die Römischi Gschicht bsunders am Ändi vo der Republik und i dr Chaiserzyt. Dr Kassius muess en huuffe elteri Schrifte gha haa zum d Informazioone druus usezie, und er het gwüss au s ryche römische Staatsarchyv bim Forum Romanum chönne bruuche, nume weiss me hüt fasch nüüt me vo dene früenere staatliche Schriften und de private Wäärch.

Es gitt verschideni neui Büecher mit em Kassius Dio synere Römische Gschicht, teils mit em griechische Tegscht und teils mit Übersetzigen i modäärni Sprooche.